In peregrinationibus nati pro domo nona

Res quidem peregrinationis nati ex luminarium qualitatibus in angulorum respectu deprehendetur, maxime autem ex qualitatibus Lune secundum eundem Ptholomeum tractatu quarto, capitulo septimo, necnon ex statu Martis in figura ipsa radicis. Nam cum Luna occidentalis fuerit seu declinaverit a decima domo vel in aliqua domorum cadentium generaliter et precipue in nona domo, octava vel septima, peregrinationes et de loco ad locum mutationes indicabit. Similiter erit si situs Martis talis fuerit et cum hoc in quadrato vel opposito Solis fuerit hora ipsa nativitatis vel in quadrato vel opposito Lune, significat itinerationes et peregrinationes. Quod si fortune pars iterum in signis, id est domibus significantibus itinera, ceciderit, erit tota eius vita ac ipsius opera et actus in locis extraneis et alienis. At si fortune loca predicta respexerint, id est loca significatorum itinerum, vel ad illa perrexerint motu equinoctii vel motu eorum naturali, dabunt nato fortunam et prosperitatem in itineribus et salvus celeriter revertetur. Sed si ea infortune aspexerint vel vadunt ad ea aut sequantur motu firmamenti vel proprio, erunt itinera nati cum labore, plena timoris et nociva operibus suis tardeque revertetur. Ex quibus etiam concludi potest, quod si tam fortune quam infortune predicta loca respexerint et cetera, quod res erit commixta et que fortior erit vincet pro maiori parte. Cumque luminaria in altera duarum quartarum orientalium figure fuerint vel in ipso oriente, id est in decima domo, 11 11] sic for undecima G vel duodecima aut in prima, secunda vel tertia domo secundum Haly in commento eiusdem textus, frequentius versus orientis et meridiei partes iter aggredietur. Quod si in aliqua duorum duorum] sic for duarum G quartarum occidentalium figure fuerint, id est in domibus predictis oppositis, vel in ipso eodem occidente rotaverint, versus septemtrionem et occidentem eius iter frequentius apparebit. Secundum Haly etiam in commento huius textus convenit ut hic respectum habeamus ad trigona, id est triplicitates in quibus ipsa luminaria et Mars steterint. Nam trigonus Arietis significat partem septem septentrionis et occidetnis, trigonus Tauri significat meridiem et oriens, trigonus Geminorum significat septentrionem cum oriente, et trigonus Cancri significat meridiem cum oriente, et quilibet horum trigonorum significat de medio habitationis partem illam que est opposita sue parti. Similiter si significatori itinerum applicuerit aliquis planeta septentrionalis, sicut est Iupiter, significabit partem septentrionis. Si applicuerit ei planeta meridionalis, sicut Venus, significabit partem meridiei. Et si applicuerit ei planeta occidentalis, sicut Mars, significabit partem occidentis. Et si fuerit planeta orientalis, sicut Saturnus, significabit partem orientis. Et Sol adiuvat in partibus orientalibus et Luna in occidentalibus. Expedit autem ut omnes res istas misceas simul unam cum alia et secundum partem vincentem erunt frequentius itinera nati. At si ipsa signa que peregrinationem significant vel eorum domini unius forme fuerint, fiet iter quandoque. Et si duorum corporum vel duarum figurarum extiterint, erit iter continuum diuque durabile. Signa unius figure vel duarum cuilibet nota sunt, sed queri hic posset qui sint qui sint] corr. ex que fuerint G planete unius et duarum figurarum. Venus itaque, Mars et Saturnus sunt unius figure et Mercurius et Iupiter uterque est duarum figurarum. Similiter potest esse planeta unius figure si fuerit signum in quo stat figure unius, et erit duarum figurarum si fuerit in signo duarum figurarum vel quod aspiciat se cum plus uno planeta. Et signa dantia itinera sunt ea in quibus stat significator itinerum. At si Iupiter et Venus locis iter significantibus ac locis luminarium dominentur, nulla erit nato in itinere formidatio, sed ab eo desiderabitur, et erit dilectus in itinere, vel itinera erunt in legationibus amicorum, et adiuvabunt eum et habebunt habundantiam rerum sibi expedientium. Quod si cum eis Mercurius fuerit hac predicta occasione, magnum consequitur proficuum, suamque legationem ad exitum producet, et dabuntur ei dona, et honorabitur. Quod si Saturnus et Mars locis luminarium dominentur, maxime si unus alteri fuerit oppositus in longitudine, non proficiet in itineribus suis et fortia pericula in eis patietur. Et si fuerit in signis humidis, periculum erit in transitu aquarum vel propter infortunium aride vie et deserte. Quod si in signis fixis fuerint, hoc ex precipitatione et ex ventorum flatibus validis adveniet vel propter casum a locis altis per ruinam. Si vero fuerint in signis solstitialibus vel equinoctialibus, ex earum rerum quibus opus habent defectu et privatione, ac per qualitates corrupti aeris egritudinem inferentis ei hoc accidet periculum. Si autem in signis humane fuerint forme, ex viarum abscisionibus seu proditionibus vel depredationibus evenire dicemus. Sed si fuerint in signis quorum forme silvestrium animalium formis assimilantur, ex luporum rapacitate sive ex terre motu continget. Quod si fuerit Mercurius cum eis, ex aggressionibus timorem inferentibus vel ex bestiarum morsibus seu venerosorum animalium occasisone proveniet, idem etiam erit si Mercurius habuerit participationem cum ambabus infortunis. Tempus autem quando hec accident ex qualitatibus in subsequentium angulorum principiis, id est revolutionibus advenientibus, deprehendetur.

Leupoldus in capitulo de peregrinationibus: Pro peregrinatione et itinere considera 9 9] sic for nonum G et dominum eius, et planetam qui est ibi et circum, et partem peregrinationis et dominum eius, et almutam super hec loca, sive sit unus sive duo. Et si inter unum istorum et alium cum ascendente est aliqua complexio vel commixtio secundum aliquem 4 modorum, peregrinabit natus et non habebit victum in domo sua. Item si Mars est in angulo et Luna cum aspexerit dominum domus sue, in aliis regionibus vivet. Dominus none si fuerit impeditus, natus erit male fidei et multe simulationis, nec proderit ei peregrinatio et perdetur substantia eius. Et similiter cum fuerint mali in domo nona vel si Mercurius fuerit almutas almutas] sic for almuta G super eam et congruerit domino ascendentis, natus erit contendens in fide et disputator. Et si Mercurius tunc est orientalis et fortunatus, erit ille ex hoc magnus et laudatus, si impeditus et occidentalis, occurret ei malum ex hoc. Et si loca peregrinationis boni aspiciunt, exilium nati erit bonum, si mali, econtra. Avertetur a fide sua, in cuius nativitate Mercurius est in octava et cui pars felicitatis fuerit impedita.

Bonatus tractatu quinto, consideratione 113: Si aliquis malorum fuerit impeditus in nono non habens ibidem dignitatem, natus accusabitur et culpabitur cum causa et sine causa. Si fortuna in eo fuerit non impedita habens ibidem dignitatem, natus laudabitur et honorabitur cum causa et sine causa.