L〈ucas〉 Gauricus Neapol〈itanus〉 Lectoribus foecilitatem.

Stellas fixas Ptolemaei ad annum salutis 1530 redigere.

Si quispiam omnes stellas fixas Ptolemaei tempore observatas ad nostram hanc tempestatem seu Mavis annum Christi 1530 redigere voluerit, ipsarum longitudinibus g〈radus〉 19 m〈inuta〉 50 adiiciat: illicet et voti post modo compos erit, et quamque Ptolemaeus et Alfonsus non erraticarum stellarum latitudines semper invariabiles fore existimaverunt, Gauricana Uranie ex borealibus latitudinum partibus 25 sexagesimas subduceret, australibus autem exaggeraret. Quod docet exemplo carta notata brevi.

Animadvertas, lector studiose, apud magnum hunc astronomum (me iudice) mensium et Grecorum et Aegyptiorum nomina esse admodum perplexa atque confuse, veluti eum patebit legentibus. Quod longa satis annorum 1400 intercapedine iam contigisse existimandum est. Quom ex variis quidem exemplaribus toties excaepta sint, et facile librariorum inscitia perperam descripta.

Nos autem, etsi nullibi quantam in diversarum nationum mensibus contreversiam invenerimus, quandoquidem nedum variis (uti par est) nominibus, sed ordine maximam faciunt diversitatem, in presentia plerosque hinc inde non sine maximo labore repertos calcographo imprimendos tradidimus, ut posteris praecipue ingeniosis investigandae veritatis occasionem praebeamus. Non etenim inventis addere difficile est.