fortunae sortem continere, ut quam rationem sive configurationem habet Sol ad orientalem finitoris partem eam habeat et Luna ad partem fortunae et sit veluti lunaris quidem horoscopus. Verum et illud videre oportet utrum luminum altero magis in consequentia feratur, nam si Luna, numerum partium ab horoscopo reiiciendarum pro sorte fortunae habenda reiicere veluti consequentia signa versus oportet, si vero in praecedentia magis Sole fertur Luna versus praecedentia.
〈Commentarius〉
Intendit quod debemus detrahere locum Solis a loco Lunae, et quod relinquitur de signis, gradibus et minutis addere ascendenti, et ubi cadit est locus partis fortunae. Exemplum in quarta genitura locus Solis est signa tria, gradus tres minuta 52. locus Lunae est signa 0. gradus 18. minuta 9. detraho signa 3. gradus 3. minuta 52. ex signis 0. gradibus 18. minutis 9. addita una revolutione integra, id est, signis 12. quia aliter detractio fieri nequit, relinquuntur signa 9. gradus 14 minuta 17. quibus addo signa 7. gradus 26. pro ascendente et fiunt signa 17. gradus 10. minuta 17. Et quia excedunt unam revolutionem abiicio illam, id est, 12. signa et relinquuntur signa quinque, partes decem, minuta 17. quae si numerentur ab initio Arietis finiuntur in partibus 10. minutis 17. Virginis et ibi est pars fortunae quartae geniturae. Dicit igitur Ptolemaeus quod quantum distat Sol ab ascendente, tantum Luna a parte fortunae. Et similiter si Luna est a coniunctione ad oppositionem tunc Luna sequitur Solem, et pars fortunae semper erit sub terra, et sequetur ascendens, quod si Luna transierit oppositionem ipsa antecedet Solem, et ita pars fortunae antecedet ascendens, et erit semper supra terram. Causa igitur huius est haec sit Sol in A, Luna in B, et ducta fuerit AC linea a Sole ad ascendens, et a Luna BD aequalis AC, tunc erit ex monstratis in tertio elementorum Euclidis arcus BD aequalis AC detracto communi AD relinquetur AB, aequalis CD. Cum igitur addiderimus differentiam Lunae a Sole ascendenti consurget locus sortis, qui est locus ubi radius Lunae a Sole refractus aequalis radio eius quo ascendens illuminat reflectitur. Sors igitur fit addita distantia Lunae a Sole ipsi ascendenti. Haec igitur est ratio sortis, quae in aliis planetis non tenet, quoniam non sunt luminaria, et non reflectunt lumen Solis.
Verum et illud videre oportet) Hunc locum melius esset sic legere, verum et illud animadvertere decet utrum luminum, altero magis in consequentia feratur, quia si Luna numerum partium pro sorte habenda ab horoscopo in consequentia reiicere oportet. Si vero Sol in procedentia et sensus est clarus, ante oppositionem, partes inter Solem et Lunam adiiciendae sunt horoscopo, post oppositionem partes inter Lunam et Solem sunt auferendae ab horoscopo, ne cogatur plus semicirculo addere, quia luminaria nunquam pos-