〈V.20〉 Capitulum XX: De diversitatibus aspectuum discernendis

Quando igitur volumus invenire quantam Lune per singulos progressus diversitatem aspectus in circulo habet qui per ipsam et punctum verticis describitur, considerabimus quot equalibus horis in proposito climate distat a meridiano, et has queremus in angulorum eiusdem climatis tabula, et appositos hore gradus in signo in quo Luna est in ordine secundo aut omnes aut hore parti congruentes habebimus illos quibus a puncto verticis Luna distat in circulo qui per eam et punctum verticis describitur. Quibus cum intrantes in tabulam diversitatis aspectuum queremus eos in primo ordine et correspondentes eis numeros in ordinibus quatuor qui post ordinem solarium diversitatem deinceps sequuntur, hoc est in tertio, quarto quinto et sexto, seorsum singulos conscribemus. Deinde capiemus inequalitatis in illa hora exquisite numerum ad exactam maximam longitudinem aut ipsum, aut, si 180 excederet, reliquum ad 360, et huiusmodi numeri graduum medietatem semper in eisdem numeris queremus, sexagesimasque ipsi correspondentes seorsum in septimo et octavo ordine capiemus, et quotquot sexagesime septimi ordinis sunt, totidem a differentia quarti ordinis capiemus, easque tercii ordinis diversitati semper addemus, quotquot autem in octavo ordine inveniuntur, totidem a differentia sexti ordinis sumemus, et diversitati quinti ordinis semper rursum addemus, et duarum diversitatum ita congregatarum excessum scribemus. Demum considerabimus quot gradibus Luna a solari gradu vel a diametraliter opposito distat, propinquiorisque distantie gradus in primi ordinis numero inveniemus, et quotquot sexagesime in nono ac ultimo ordine ipsi correspondent, totidem ab excessu duarum diversitatum iam scripto sumentes, que fiunt minori semper addemus, hoc est illi quam ex tertio et quarto ordine exactam habuimus, et secundum congregatum hinc numerum aspectus lunaris mutatur in circulo qui maximus per ipsam et verticis punctum describitur, hinc simpliciter solaris quoque diversitas in simili situ solarium eclipsium gratia ex gradibus qui in secundo ordine appositi sunt per quantitates arcus qui in … qui] add. marg. G a vertice distat perspicitur.

Verum ut etiam diversitatem que tunc fit ad circulum qui ad medium signorum est tam per longitudinem quam per latitudinem discernamus, easdem rursum horas equales quibus a meridiano Luna distat in eadem parte tabule angulorum inveniemus, capiemusque gradus numero horarum appositos ex ordine tertio, si ante meridianum Luna invenitur, sin vero post meridianum, ex ordine quarto eosdemque ipsos conscribemus, si