〈III.11〉 Caput XI

Textus XXX: De locis apheticis

Primum sane existimandum est esse aphetica loca, in quibus omnino reperiri necesse est eum qui velit vitae gubernandae iurisdictione potiri ut circa horoscopum, a quinis partibus prius supra finitorem emergentibus usque ad 25 reliquas succedentes; et qui has tricenas partes dextris hexagonis radiis contingit qui boni daemonis locus dicitur; et qui tetragonis nimirum coeli supra terram fastigium; et qui trigonis qui Deus appellatur; et qui oppositis is nimirum qui in occasum provolvitur. Praefertur caeteris coeli culmen proxime qui circa ortum est; deinde qui coeli fastigio succedit post qui circa occasum existit tandem qui medium coelum praecedit. Omne enim quod subterraneum est merito post habendum est in praeclara adeo imperii genere eo tantum excepto quod cum horoscopo in lucem prodit. Ex iis etiam quae supra terram extant, neque illum locum qui nullo familiaritatis vinculo cum ascendente cohaeret accipere convenit eouenit B, qui Argos, id est piger Graecis dicitur neque eum qui prius exortus erat, qui mali daemonis appellatur, quoniam astrorum ibi commorantium in terram effluxus cum etiam ab angulo praecipitetur, turbat ac veluti abolet, quae ex terrae humoribus nascitur fumosa tenebricositas qua de caussa suis neque coloribus neque magnitudinibus apparent. Deinde aphetas sive vitae gubernatores accipere oportet non quosuis sed praecipua geniturae loca Solis nimirum et Lunae, horoscopum, partem fortunae et horum gubernatores.

〈Commentarius〉

Tria proponit primum qui possint esse vitae gubernatores, et sunt quinque qui esse possunt, Sol, Luna, ascendens, pars fortunae, et dominus horum locorum. Secundum, sunt loca in quibus positi aphetae possunt decernere vitam et sunt quinque per ordinem, primus est medium coeli, secundus est ascendens, tertius est undecimae domus seu locus bonae fortunae, quartus est septima domus, quintus et ultimus qui omnibus est debilior est nona domus, quam Deum vocat. In his igitur si inveniatur unus ex illis quinque significatoribus erit apheta, id est, decernet annos vitae et robur eius reliquae septem domus sunt inutiles. Manifestum est igitur quod poterunt esse plures aphetae simul, et plerunque contingit, ut in prima, et secunda, et tertia, et quarta genituris, quandoque unus tantum, licet raro in his qui adolescunt. Tertium est mensura domus, et pro exemplo capiamus decimam, dicit Ptolemaeus quod illa tenet quinque gradus ante initium, et vigintiquinque post initium, et intelligit de gradibus aequinoctialis. Veluti gratia exempli, in octava genitura medium coeli habet rectam ascensionem partium 289. minutorum 47. volo scire ubi vigesimaquinta pars finiatur. Scio quod quilibet quinque gradus occupant tertiam horae partem, igitur vigesimus quintus gradus aequinoctialis distat hora una, et duabus tertiis a coeli medio. Quaere igitur gradum prope quar-