praecipuas configurationes positae, supergrediuntur supra maleficas quae morbis vitiisque occasionem dabant, tunc vitia decentia erunt minimoque dehonestamento, morbi mediocres beneque tractabiles et nonnunquam facile curabiles, quando videlicet beneficae stellae orientales sunt. Ac Iuppiter quidem humanis auxiliis per opes et dignitates tegere vitia solet morbosque mitigare, cum Mercurio etiam medicamentis et medicorum consiliis. Veneris stella deorum praedictionibus et oraculis vitia quodammodo elegantia plausibiliaque efficit, morbos divinitus petitis curationibus mitigabiles, at si illi Saturnus congressus sit non sine ignominiosa poena et vulgo nota aliisque id genus, si Mercurius non sine subsidio et lucro ad ipsum aegrotum ex morbis et vitiis redituro.

〈Commentarius〉

Septem facit, tria pro vitiis, tria pro morbis, et unum commune quod ad causam agentem pertinet. Cum enim vitia sint insanabilia, morbi vero sanabiles, sufficit in vitiis ut tegantur, et honestiora reddantur. Morbi vero ut curentur convenit teguntur vero et curantur validioribus auxiliis, ut etiam validioribus causis fiunt deteriores. Itaque ab orientalibus stellis maiores procedunt utilitates et a beneficis auxilia, velut a maleficis detrimenta. Ergo si nullae sint beneficae, nec morbi, nec vitia minus mitescunt, si autem beneficae supplodantur a maleficis, utpote quod sint in illarum dignitatibus, scilicet maleficarum, beneficae sub terra sint, et in cadentibus locis, auxiliabuntur quidem, sed valde parum. Si vero beneficae fuerint potentiores, maximeque si sint orientales, morbos quidem curabunt, vitia vero tegent. Reliqua sunt manifesta, nisi quod Mercurius cum per se sanare non possit, multum tamen Iovem et Venerem si bene sit dispositus, iuvat. De morbis quidem Ptolemaeus fatetur, quod divino praetextu, astrorum autem auxilio, curentur, de vitiis nequaquam. Quamobrem Christi et sanctorum miracula non infringit, his enim vitia curabantur non morbi, nisi de socru Petri, quae febri curata est, sed id inter mira non miracula refertur.

〈III.17〉 Caput XVII

Textus LXIIII: De qualitate animi

De iis igitur quae corpori eveniunt sit hoc veluti simulachrum quoddam considerationis. Eorum vero quae ad animae qualitatem pertinent, intellectus quidem et rationis contemplatio a Mercurii constitutione accipienda ubique est, morum vero et hebetiorum animae actionum et a ratione secretarum a luminaribus corpulentioribus, nimirum a Luna et astris illius vel separationi vel applicationi configuratis.

〈Commentarius〉

Differentiam rationis et intellectus si velis habere, quoniam ea ad Mercurium spectant, ab hebetioribus animae qualitatibus, quae a Mercurio pendent quales sunt prudentia, constantia, urbanitas, simplicitas, comitas, musicae peritia, curiositas, diligentia, gravitas, austeritas, pietas, superbia, liberalitas, nitor,