cessus nec ingressus, ut suo loco ostendetur. Ad tertium qui debilem aphetam et naturaliter etiam debiles ex finium malorum concursu cum processibus, ex antisciis (commune, hoc est nomen intuentibus, et imperantibus ac obendientibus.) Ex occursu fixarum maleficarum vel in eadem longitudine, vel etiam in eodem circulo positionis, si ex familia aut gente valde brevis vitae sint pereunt. Quod etiam ultimo argumento satisfacit. Ad quartum fieri potest, legiturque de duobus quodam Ioanne de temporibus et alio. Cum autem tot sint necessaria vix nisi in multis seculis contingit. Ad quintum verum est ratione periodi non roboris naturae. Quo fit a levioribus anaeretis intercepti minus iuvant, quam qui in intemperata habitant regione. Quod si temperata iuxta polos posset inveniri, ut de Hiperboreis fabulantur argumentum concluderet. Ad sextum assumpsit hoc Ptolemaeus ad confirmandam rationem finium, quam intendebat, nam et ex falso verum sequitur, licet autem ad hominem sermonem habenti. Praeterea numerus ille in Saturno satisfecit, ei revolutionum numero quem vocavit Ptolemaeus restitutionem. In Iove restitutionis Martis, quod malefica esset et maior numerum dederunt. Marti autem inaequalitatis solum Iovis facta commutatione. Sed non addito numero revolutionum quod malefica esset, quasi res hominum voluntate agatur, non Dei imperio illum fraudarunt. Ut in capite de finibus visum est. Sed ut ad rem revertar, quod decepit Arabes, est quoniam si dominus aphetae potens locum ipsum praecipue bono aspectu aspiciat aphetam robustiorem reddit atque ideo etiam vitam et robustiorem, et longiorem praestat, quod nec Ptolemaeus, nec nos negaverimus, modo non res ad certum numerum annorum traducatur. Sed ad id quod anaeretas facile sibi occurrentes possit superare, aut non superare. Hoc autem et ipse iubet circumspici in capite sequenti.

〈III.14〉 Caput XIIII

Textus XXXIII: Quenam sint vitae moderande rationes

Cum vitae moderandae principes indicaverimus, amplius quoque moderationis duos esse modos intelligamus, eum qui consequentia signa versus instituitur, quam actinobiliam, id est radiorum proiectum dicimus quando in orientalibus locis nimirum a coeli culmine et ascendente interceptis vitae gubernator inventus fuerit, et eum qui non solum consequentia versus sed et in praecedentia signa peragitur quam horinaem dicunt cum in locis a culmine declinantibus reperitur.

〈Commentarius〉

Duos statuit dirigendi modos, alterum, qui fit dum significator vitae fuerit a medio coeli usque ad finem primae domus, qui est secundum ordinem signorum, et secundum ascensiones ipsius aphetae. Et in hac locus anaereta ducitur ad locum aphetae, secundum consequentiam signorum. Secundus modus est, quando significator fuerit inter cor coeli, et septimum locum, velut in genitura primogeniti mei, in qua Luna est apheta, et tunc fit duplex directio, dicit Ptolemaeus, una quae est eadem cum prima dicta, et est secundum successionem signorum ipsius anaeretae, ad ipsum aphetam secundum ascensionem aphetae. Et ita haec directio est generalis omnibus aphetis, ubicunque constituti sint ab angulo occidentis, usque ad finem primae domus, sed tamen discrimen est, quod a medio coelo usque ad finem, primae domus directio fit,