num et aestiuum, quam in aliis locis, et in fixis signis, quam mobilibus vel communibus, et generaliter Saturnus validior est interfector, quam Mars, et in morbis maxime. Secundum est quod debemus praeponere eum, qui consentit cum aliis, veluti si Saturnus et Mars sint anaeretae, Saturnus significet mortem per morbum, Mars violentam, Sol vero significet publicam, vel Mercurius latronem et furem, vel Iuppiter significet iudicium et damnationem a iustis viris, tunc dicemus quod morietur morte violenta, et non ex morbo. Et si incidant in eadem tempora Saturnus significabit morbum succedentem cruciatibus tormentotum, et tristitiae ac moerori animi, et squalori ac pedori carceris. Tertium quod insinuat Ptolemaeus est, quod si aliqua calamitas publica accedat, utpote strages in praelio, naufragium, pestis, morietur ex illa anaeretae afflictione, quae illi magis calamitati congrua fuerit.
〈III.15〉 Caput XV
Textus XLVI: De forma et temperatura corporis
Ennarata a nobis de vitae spatio pertractatione, dicamus secuti praescriptam ab initio seriem, de forma et corporis deliniatione, quandoquidem quae corporis sunt natura ante animam finguntur; et corpus cum sit densius, cognatas fere habet peculiarium suarum commistionum apparitiones, anima non nisi post et paulatim infusas sibi a prima origine dotes in lucem profert, quae vero extra nos sunt, succedenti magis deinceps tempore adventant. Observare igitur universum oportet orientalem finitoris partem et succedentes aut gubernandae eius ius possidentes errores, sicut diximus, partim vero et Lunam similiter; nam ex horum locorum iisque imperantium informandi nativa vi et horum temperatura, amplius ex coascendentium ipsis fixarum stellarum deliniatione, ea quae ad corpus fingendum spectant colliguntur, ita tamen ut primas tribuamus stellis penes quas dominandi ius est, secundas ipsorum locorum peculiari naturae. Primum igitur si quis illud singulari et simplici via prosequatur, hunc habebit modum.
〈Commentarius〉
Dicit tria sunt de quibus sermo habendus est corporis effigies, animi qualitates et fortunae casus. Corporis effigies statim apparet, ut homo natus est, animi qualitates aliquanto post, tardius fortunae casus. Igitur primum de corporis effigie tractandum est. Haec igitur sumitur ab octo rebus per ordinem. Prima est dominus ascendentis. Et secunda dominus loci Lunae. Tertia locus ascendens ab horizonte usque in finem domus, veluti si ascendat in prima genitura vigesimanona pars Leonis, capiemus Solem pro parte minore, sed Mercurium pro maiore, quia plus est de signo Virginis longe quam Leonis. Quarta est locus Lunae. Quinta stellae coascendentes domino ascendentis. Sexta stellae coascendentes domino loci Lunae. Septima stellae coascendentes ascendenti. Octava stellae coascendentes domino loco Lunae. Ista igitur sic se habent per ordinem, ita tamen ut multum faciat linea finitoris, sicut et