us ambitiosos, divinis vacantes, ingeniosos, agiles, indagatores, inventores, bene coniectantes, refutatores, divinatores. Bicorporea vero signa, varios, mutabiles, indociles, leves, permutationis avidos, neutiquam simplices, sed versipelles, amatores, musicae studiosos, negligentes, obvios, ad poenitudinem pronos. Fixa aequi observantes, ab assentatione alienos, constantes, firmos, intelligentes, tolerantes, laboriosos, rigidos, continentes, illatae iniuriae memores, coepti operis persecutores, contentiosos, ambitiosos, seditiosos, cupidos, perfractos, non facile flexibiles.
〈Commentarius〉
Locorum ipsorum naturam iam incipit declarare. Scientia et inventio a mobilitate quadam ingenii proveniunt. Ideo mobilia signa ad linguas praecipue discendas sunt aptiora. Communia ad conversationem, quia homines sunt natura fallaces. Fixa ad magna opera, et ad regnandum, nam tales decet esse graves et minime mutabiles.
Textus LXVII
Configurationum quae orientales sunt et apud horoscopum maxime quae in propria persona, liberos, simplices et praefractos, fortes, ingeniosos et acutos, apertosque faciunt.
〈Commentarius〉
Hoc est tertium et quartum stellae quae sunt orientales et maxime cum primum emergunt a terra, ut nobis Iuppiter, quia sunt potentes, faciunt liberos et suis viribus confidentes. Eligit autem ex orientalibus in mundo solum quod est horoscopo proximum, ut in sequenti ex stationibus tantum primam. Comparat autem orientalem statum, quo ad Solem exortui supra terram. Sicut in sequenti stationem primam, stellae medium coeli possidenti.
Textus LXVIII
Matutinae vero stationes et coeli culminationes ratiocinatores, constantes, magnanimos, memores, coepta urgentes immobiles, fortes, fraudis expertes, prudentes, inflexibiles, crudos, censores, negotiosos, scelerum vindices, scientiis idoneos.
〈Commentarius〉
Hic comparat stationem primam in qua adhuc planeta est orientalis, loquendo de superioribus, ipsi coeli medio, nam utrobique ut superius visum est planeta ultimum robur acquirit. Sic in sequentibus angulum occidentis, vespertinamque visionem simul confert dicens.
Textus LXIX
Ortus vero stellarum in noctis exordio, et occasus instabiles, flexibiles, infirmos, laboris impatientes, facile concitabiles, humiles, viles, timidos, dubios, timide audaces, obtusos, iactabundos, tardos.
〈Commentarius〉
Hic bifariam posset intelligi ortum stellarum in noctis exordio, scilicet cum in oriente emergunt oppositae Soli, vel cum in occidente illum sequuntur, sed intelligit tantum de stellis tertii status, id est, quae Solis oppositionem iam superaverunt. Hae igitur occasui in mundo comparantur, utrinque debiles. Debiliores tamen ratione Solis quam anguli occidentis. Ideo animam pessime affectam nunciant, neque tamen credas quod hic situs aliis in causis, adeo debilis sit, sed in animae qualitatibus validissimus exigitur.