coniunctionis equavimus, cum vero in descendente, similiter subtrahemus, sin autem diversitas latitudinis ad meridiem zodiaci fiat econtra, quando Luna est in ascendente nodo, tunc diversitatis gradus subtrahemus a gradibus latitudinis equatis in tempore apparentis coniunctionis, quando vero in descendente, addemus similiter, et sic habebimus apparentis latitudinis numerum in tempore apparentis coniunctionis, et cum hoc in tabula solarium eclipsium intrabimus. Et si inter numeros primorum ordinum invenitur, Solis eclipsim futuram asseremus, eiusque medium tempus apparentis coniunctionis proxime dicemus. Deinde conscriptis iam digitis et incidentie ac replectionis partibus que apparentis latitudinis numero adiacent seorsum ex ordine utroque, intrabimus etiam cum numero inequalitatis Lune qui est a maxima longitudine in tempore apparentis coniunctionis in tabulam equationis, et adiacentes illi sexagesimas quotquot sint tot capientes a singulorum conscriptorum excessu addemus semper his quas a prima tabula cepimus, et factos ex hac equatione digitos habebimus, quot duodecimarum rursus solaris diametri partium obscuratio in medio proxime tempore ipsius eclipsis erit. Partibus autem utriusque transitus duodecima rursum earum parte pro solari motu addita et facto inde numero ad horas equales per inequalem unius hore Lune motum reducto, habebimus tam incidentie quam replectionis tempus, quasi tamen in his temporibus nulla differentia propter diversitates accidat.

Sed quoniam inequalitas quedam sensibilis in his temporibus non inequalitatis luminarium, sed diversitatum Lune gratia per quam maiora etiam seorsum utraque superius positis semper inveniuntur et ut plurimum inter se inequalia, quamvis parva sit, diligenti tamen ipsam cura scrutabimur. Accidit igitur hoc, propterea quod quasi precedentium motuum quedam phantasie, si nihil proprie ad successionem moveri comprehendatur, in apparente Lune motu semper gratia diversitatum fiant. Nam sive ante meridianum moveri appareat paulatim ascendens minoremque semper ad ortus diversitatem faciens, tardius ad successionem videtur progredi, sive post meridianum moveatur descendens paululum rursum maioremque semper ad occasum diversitatem faciens, tardiorem similiter ad successionem progressum facere videtur. Cuius rei gratia predicta tempora maiora semper sic quam simpliciter capta erunt. Cum autem maior semper differentia propter hos diversitatum excessus in propinquioribus meridiano motibus fiat, necesse est ut