〈XI.11〉 Capitulum XI : De computatione motus longitudinis quinque planetarum

Quandocunque igitur a periodicis longitudinis inequalitatisque motibus apparentes cuiusvis stellarum motus invenire voluerimus, computationem calculi uno et eodem modo in quinque planetis faciemus.

Nam cum a tabulis mediorum motuum equales longitudinis et inequalitatis motus integris semper reiectis circulis in tempore posito habeamus, gradus qui tunc a maxima excentrici longitudine sunt usque ad locum motus medie longitudinis in tabula inequalitatis stelle queremus, et appositos numero in ordine tertio gradus equationis longitudinis cum additione subtractioneve que in ordine quarto colligitur, si numerus graduum longitudinis in ordine primo invenitur, subtrahemus a gradibus longitudinis et addemus gradibus inequalitatis, sin vero in secundo longitudinis tunc gradibus addemus et subtrahemus a gradibus inequalitatis, et sic utrosque motus equatos habebimus. Deinde numerum inequalitatis a maxima longitudine iam equatum queremus rursum in duobus primis ordinibus, et appositam ei additionem subtractionemve in ordine sexto, qui est medie distantie, conscribemus. Et similiter numerum medie longitudinis quo primum intravimus queremus rursum in eisdem numeris, et si in primis versibus qui maioris longitudinis quam media sunt, quod a sexagesimis octavi ordinis perspicuum est, appositas ei sexagesimas in ordine in ordine] corr. ex longitudine G ipso octavo quotquot sint totidem capiemus, a differentia posita in versu conscripte iam medie additionis subtractionisve in ordine quinto qui maxime longitudinis est et quod factum erit subtrahemus ab illis que conscripsimus, sin autem numerus longitudinis in inferioribus minorisque longitudinis versibus quam longitudo media invenitur, sexagesimas ei in octavo similiter appositas ordine quotquot fuerint totidem ab apposita differentia additioni subtractionive medie conscripte in ordine septimo qui minime longitudinis est capiemus, quodque factum fuerit illis addemus que iam conscripsimus, collectosque gradus additionis subtractionisve iam equate, si numerus equate inequalitatis in ordine primo inveniatur, addemus longitudinis primum equate gradibus, sin vero in secundo, subtrahemus ab ipsis, collectumque graduum numerum a maxima que tempus ipsius planete sit longitudo connumerantes ad apparentem eius locum perveniemus.